2009/09/24

فستان ازرق

ازيكم اخباركم ايه

وحشتونى

حكتلكم قبل كدا على حكاية البنت الى ليها غمازتين لو حد فاكر

النهارده حكايه تانيه من نفس المكان

كنت ف فرح ابن خالتى النهارده انتوا عارفين... انا ف الواقع مكنتش رايح لولا ان ماما اجبرتنى

علشان مشفش بنت عمه الى كانت متربيه معانا

بصوا

هى مش متربيه معانا
فى الواقع انا الى مربيها
وهى الى مكبرانى

اول مره شفتها كان عندى 6 سنين وهى كان عندها اربعه
وفضلنا مع بعض لحد ما بقى عندى 11 سنه

هتقولوا لعب عيال
عارف

مفيش احسن من لعب العيال
فضلنا مع بعض لاننا عاوزين نبقى مع بعض وبس
هى قالتلى انها بتحبنى على فكره
وانا مفهمتش قصدها ايه ولا هى كانت فاهمة

وحلمنا مع بعض بكل حاجه
هى كانت مصرة تسمى ابننا بوجى وانا كنت عاوز اسميه جلندايزر
وكانت عاوزه تعمل اوضة كلها شيبسى والحنفيات تنزل ميرندا برتقان

وتجيب فساتين زرقه

كل الدولاب يبقى فساتين زارقه بحزام اسود عريض

وسافروا ورجعوا وانا عندى 15 سنه
وكان عندها 13

كان موقف غريب قوى

صوتى اخشن من اخر مره سمعته
وعينها انعم من اخر مره شفتها

قابلتها على السلم كل يوم لمدة شهر

بصراحة
كنت بستناها من ورا الباب واول ما احس انها نازلة اعمل كأنى نازل

وهى تعمل كأنها مصدقه انها صدفة

وف يوم لفت وقالتلى كفاية لعب عيال وحشتنى
وانا قلت بلمكبا بابي بلك بلفقحد يبت ط

ايه؟؟

وابييا لبللنكمل

انته بتقول ايه؟؟؟

وانتى كمان

عارف هتقولوا والبنت الى بغمازتين

ايه انتوا مش بتعرفوا تعدوا البنت ام غمازتين ظهرت واختفت وهى مسافرة

بشكل ما رجعنا تانى سوا بس بشكل مختلف
طبعا اسم الولد كان يا اما عاصى من نحيتها يا اما ادهم من نحيتى
واوضة الشيبسى بقت اوضة للتوك بتاعتها وحنفية الميرندا البرتقان بقت كبيتن لمون ف كازينو

والفساتين الزارقه الى بحزام اسود فضلت

وقالتى انها بتحبنى على فكره
بصراحه متهيقلى اننا برضه مكناش فاهمين
المره الوحيدة الى اتخانقت علشان حد كان بسببها وبصراحه هى كانت بتحب كدا جدا
وكانت بتحب اما اضحكها
وكانت بتحب انى بسيب كل اصحابى علشانها
هى عمرها ما سابت حد عشانى

بس كفايه انى كنت بكلمها

فضلنا كدا سنه او اتنين او تلاته مش عارف ...انا فضلت كدا سنين

بس هى ف مكان ما اتغيرت

ف محطة ما

فجأه انا معدتش روش كفاية
شكل قميصى المقفول بيدايقها
نضارتى بتنرفزها
طرقتى ف الكلام و ف الضحك بتكسفها

مش عارف دا بدأ امتى بس حسيته

اكيد لما تقعد شهر متردش عليا يبقى فيه حاجه غلط

وعرفت انها كانت بتكلم محمد مطاوع
عرفت منه هوا
كان بيسألنى يتعامل معاها ازاى بما انى اكتر واحد عرفها هههههههه

شفتوا الجمال
الغريب انى قلتله يتصرف معاها اذاى
كان كل ما تقوله كلمه او تطلب منه طلب ميردش قبل ما يسألنى اعمل ايه

كنت حاسس انى كدا مبعدتش عنها
وانى لسه معاها
انا الى بتكلم
وانا الى بلمس ايدها
وانا الى بضحك معاها
مش عارف اسم ولادهم كان ايه
ومش عارف لون اوضهم ايه ولا فيها ايه
وخايف تكون فساتينهم زرقة

بس كنت انا الى بحبها وانا الى معاها

انا يا مطاوع مش انته

محبتش فيك غير الى انا عملته

ولما زهقت انا وهى من مطاوع رميناه
كنت عارف الزرار الغلط وخليته يدوس عليه

وراح مطاوع وجه يعده حازم وبعد حازم احمد وجية وبعده اسلام وبعده احمد مصطفى

ف كل مره كان ليا حد بستخبى وراه

حتى لما كنت بعيد عنها كان لازم احبها وتحبنى من ورا واحد تانى
انا قلتلكوا انها كانت حلوه؟

لازم تكون حلوه!

مش هتشوفوا زيها ابدا

ومش هقدر اوصفها
الجميل ميتوصفش غير بالجمال

اعصابى معدتش قادرة تستحمل كل الضغط دا

كلمتها وقلتها ارجوكى حبى الى تحبيه
واعرفى اى حد
بس متعرفنيش اى حاجه
ومتخلينيش اعرف
كفايه عليا لحد كدا



شويه بابا كلمنى ف انه يخطبهالى وانا رفضت
مش عارف ليه حد فيكم يعرف؟


وهى كمان رفضت
بس انا عارف ليه
لانها بتحبنى


هى قالت كدا


واتخطبت طبعا
النهارده بقى شفت خطيبها

ايه دا

يعععععععع

دا مش روش خالص
ومش هيقعد معاكى ف كاززينوا على النيل ويشربك لمون

مش هيشتريلك شيبسى واكيد مش هيسمى ابنه بوجى
يا مجنونه انتى عملتى ايه ف نفسك

مش هيقولك نكت علشان يضحكك
شكله مش بيعرف

شفتى
مش قلتلك
اديكى عيطى اهه
بتعيطى ليه انتى قلتى لاء
متبصليش كدا انتى مخطوبة

هاى هاى انتى متبصوليش لو سمحتى انتى بتبصى فين انا النحية التانيه بس متبصليش

هاى انتى مش شايفانى؟

انا شايفك؟

انتى بتعبطى

انا عارفك

بس هو لاء
هو مش عارف انك بتعيطى وانك كدا مقهوره
مش هيفهم ريحينى

اقوم اضربه؟

هسميهم كلهم عاصى بس ردى عليا
ليه عملتى فينا كدا
انا بقيت روش
---------------------------------------------------------------
اى تشابه بين الاحداث دى وحياتى الحقيقة هو على سبيل العمد مع سابق الاصرار والترصد

2009/06/02

بنت بغمازين


او ماااااااااااااااااى جاد

اووووووو مااااااااااااااااااااااااااااااااااااى جاد


مش هتصدقوا شفت مين النهاردها


اه هى الى كانت معايا من اولى اعدادى


الى كنت بشد ضفيرتها علشان اضايقها والى كانت بتجيبلى بسكوت شمعدان علشان تصالحنى

هى

الى فضلت معايا لتالته ثانوى
الى كنت بأخد كشكولها علشان اضايقها والى كانت بتجيبلى قصص رفعت اسماعيل علشان تصالحنى



متعرفهواش اقعدوا اقعدوا علشان احكيلكوا عليها

انا فاكر اول مره شفتها

كنت صاحى من نومى متنكد لبست اى حاجه ف اى حاجه ونزلت من البيت رايح للاستاذ عبد الباسط مدرس العربى ولقيت قدامى ضفيره

ضفيره طويلاااااااا لحد اخر ضهرها وكانت لابسه بلوزه صفرا وبنطلون ابيض وماشيه قدامى بسرعه وضفيرتها بتتمرجح

حاولت امشى بسرعه علشان اشوف وشها من غير ما تاخد بالها لانى كنت لابس لبس فظيع

ببص لقيتها طالعه العماره بتاعة الاستاذ عبد الباسط

طلعت وراها وف الدور التالت رنت الجرس

يا نهار بتنجان هى بنت الاستاذ عبد الباسط ولا ايه

دخلت ودخلت وراها وانا قلبى سامع صوت دقاته ف ودانى الحمراء ومتخيل ان استاذ عبد الباسط بنظره واحده هيعرف كل حاجه وهيعرف انى كنت ناوى ابص على وش بنته يا دى المصيبه اتصرف ازاى

دخلت اوضه الدرس وانا سابح ف بركه من العرق

لقيت الضفيره ف وشى

الضفيره ف وشى دى مش بنته دى مش بنته

هى بالنسبه ليا لحد اللحظه دى ضفيره وكنت خايف لما عينى تيجى ف عينها معجبهاش وتستتقل دمى اووووو اللبس انا لابس الترنج وبس

اعمل ايه اعمل ايه اروح اغير هدومى؟

"ادخل يا احمد" قطع عليا صوت الاستاذ عبد الباسط كل الافكار ووجه الضوء عليا ولف كل الى ف اوضه الدرس يبص عليا

يا ارض انشقى وابلعينى يا ارض انشقى

يا ... لفت وضحكت عندها غمازتييييييييييييييين

ضفيره طويله وغمزتين وعيون شقيه وبريئه دا كان اكتر من انى استحمله بصيت ف الارض

وقعدت ف الكرسى الى قصادها ومبصتلهاش تانى طول الدرس

وبدأت 6 سنين من حب المراهقه الصامت ومن اول لحظه عرف الاستاذ عبد الباسط وتواطئ معانا

كنت عارف انها بتحبنى وهى عارفه انى بحبها ومتكلمناش ابدا ف الموضوع دا

كانت بنا احلام ووعود وأمانى من غير ما نقول كلمه منها لبعضنا

شغف وشوق واشتياق

وشفتها امبارح

شفتها

بس مش عاوز افتكر انى شفتها


ضفرتها استخبت ورا ايشارب زيتى رابطها ربطه ثمانينيه

وغمازتيها مخنوقين تحت اطنان من الدهون الى اتوزعت بسخاء على جسمها

بلوزتها الصفرا وبنطلونها الابيض اتحولوا لبلوزه وجيبه زيتى ف منتهى منتهى العجز

ونظرتها الشقيه بقت نظره ست بيت مهمومه بمصاريفه

والكراسه والقلم اتبدلوا بعربيه طفل رضيع بيشاركه فيها كيس طماطم وكيس بطاطاس والعيش ف الدور الى تحت

وضحكتها بقت نهجان مؤلم بفعل مجهود مشى خطوتين ف الشمس

ايه الى بيحصل دا

انا مين ....أذاى بقينا كدا...انا محبتش دى ولا دى هى الى حبتنيى


معدش فاضل غير شوية زكريات مصفره متربه بيتحرقوا واحده ورا التانيه

ودى واحده

معدش باقيلى حاجه من طفولتى

انا عاوز طفولتى

2009/05/15

جلبابى الازرق الجديد

ليوم اشترت لى أمى جلبابا أزرق مقلما من عم عطى الخياط

تقول أنه من بواقى قماش العمدة شخصياً,قد أعد خصيصا كى ينام فيه ساعة العصارى ,وأنه سمح لعم عطى بأن يعطى باقى القماش لمن يريد,وأمى تريد, أرتديت جلباى وركضت فى شوارع قريتنا الترابيه مزقططا بها وبه كنت أمد فى خطواتى حتى أسبق الناس وان فعلت تباطئت عن عمد كى يرونى فى جلباب العمده , اتظاهر بالتفكير كى أقف هنا قليلا ليرونى افضل,اتصنع انى انفض مركوبى اتحسس الارض كانى ابحث عن شئ,اتشاغل تحت شباك "أمانى"رفيقه لعبى كى ترانى ,اتقصع فى وقفتى وافرد ذراعى حتى أخره كانما هذا ما أفعله بجلبابى كل يوم ,جلبابى الأزرق المقلم توأم جلباب سيدنا العمده,تخرج لمندرة دارهم بشعرها المنكوش الناعم فى ضفيرتين , فأفرد هامتى اكثر , وأتصنع جلبه ,تجلس وتولينى ظهرها ,وتبتسم انا أعرف أنها تفعل وتفك ضفيرتيها ,يحمر وجهى كفرط الرمان ويتقافز القلب كالفرخ البردان ,تمرر أصابعها بخصلات شعرها . فينساب فى خطوط كخطوط جلبابى ,أقترب منها "أمانى" تلتفت بجانب وجهها "تيجى تلعبى معايه؟"
تستدير وتبتسم انا أعرف أنها تبتسم ,"جلبيتك شبه بتاعت سيدى العمده ,بس هو مش بيلبسها غير فى اوضة النوم, أخاف العب معاك يضربنى" لم تكن تبتسم

انا اكره جلبابى الازرق الجديد

العاقيه عندكم فى المسكرات

بقريتنا طفلا كنت

مساء الخميس ارتدى قميصى وبنطالى القماشى القصير, حذائى الجلدى الاسود الذى يشبه حذاء ابى , و"فيونكه" فضى اثبته بأستك ابيض فى رقبتى, امشط شعرى مبرزا الاخدود على جانب راسى الايسر. واضع الكولونيا, امسك بيد ابى واجرى امامه كى نصل اولا, لأقف فى أول صف المهنئين , اشد قامتى واشفط هواء قريتنا كله _كنت اعتقد ان الارض بنايه كبيره ونحن على السطح _وامد كف دقيق كى اصافح الرجال القادمين الى الفرح,لا يا عم لا تداعبنى فأنا رجل كبير ..قصير فقط بعض الشئ ,لا.. لا اريد حلواك فأنا جاد وارسم ملامح ابى الغاضبه حتى تعرف انى كبير, ولا تضحك فأنا عابس مثلك ,افكر فى هموم حياتى وارسم 111 بحاجبى , اضع يدى على جبينى واخرى على خدى كعلامه مضاعفه للتفكير والتركيز,اذا انا كبير,يجلس المدعوون على صفوفهم المتجاورة المتقابلة يلهجون بعبارات المباركه, يعوجون طواقيهم ,يشدون اربطة اعناقهم ,يعدلون عمائمهم واجرى بينهم , مبروك يا عم, كل سنه وانت طيب يا خال ,زادنا الله نور بقدومك يا أبى الحاج, العقبى عندكم فى المسكرات هكذا كنت انطقها المسكرات ,كنت احبها واسنانى وطبيبها يشهدون على ذلك, وكانت سعادتى سرها لحظه المسكرات القادمه بلا ريب فى منتصف الفرح, اجرى الى امى فى غرفة الحريم , "امى اريد المسكرات عقبى عندك فيها,احضر فرح ابنك", كانت تضحك وتعطينى المسكرات، وبصوت مشروخ مبتهج تصرخ مع باقى الحريم
"ادحرج واجرى"
اتقفاز انا وابناء عموموتى ككتاكيت عشتنا صائحين
"يا رمان"
"وتعالى على حجرى "
" يا رمان"

لم اكن اعرف هذا الرمان , ولكنى كنت اتقافز معهم , ابن أبويا سليم الفشار يقول ان العمده يعرف ،بل يقول انه رأى العمده وهو يمسك رمان فى يده , رمان كثير, يقول انه احلى من المسكرات البيضاء التى تلتصق فى يدى ,انه فشار كابيه قلت له انه فشار , يقول ان ابى فقير ولا يمتلك الا جلبابه لهذا لا يشترى لنا الرمان ,انت فشار يا أبن أبويا سليم, يقول ان بدلتى وحذائى و"فيونكتى" الفضيه ملك قديم لأبن العمده , انت كذاب كذاب يا ابن سليم , انت تغار منى , قلت له ان يسكت يا امى قلت له ان يسكت انت فشار يا ابن ابو سليم انته فشار يقول ...فشار فشار

يقول..فشار فشار ..صمت
يقولون ان لون الرمان سال من رأس ابن سليم

2008/12/28

عذرا انا مليش غير اخ واحد وأسمه محمد

ضربو غزة أن أن أاااا "موسيقى تصويريه"

أيه يعنى مهما كل يوم بيضبروها

لأ يا بنى ادم افهم المره دى ضربوا جامد قوى

أحسن وجع ساعه ولا وجع كل ساعه يخلصوا عليهم كلهم دلوقتى ونخلص من الوش دا بدل ما كل شويه
يضبروا ونشجب وندين
يضبروا ونشجب وندين
يضربوا ونشجب وندين


هما بقى المره دى يضبربوا ضربه كبييييييره قوى ومحدش يفضل فى غزه نقوم احنا نشجب شجبببببه كبيره قوى وندين اداااااااانه كبيره قوى ونخلص بقى خالص من موضوع فلسطين

يتبقى الضفه

ان شاء الله ربنا يكرمنا ويضربوها ونخلص



واهم حاجه ومع انك هتصعب على يا عمور ...هنقفل ام الجامعه العربيه ..بيت العرب .. قال بيت العرب قال جتهم ستين بلوه تاخدهم وتشيل وتحط عليهم قادر يا كريم ونفضها سيره بقى . ..وكل شويه لقائات واجتماعات ومؤتمرات قمه اشى عادى واشى استثنائى واشى مغلق واشى مفتوح واشى اهبل واشى غبى وسمو فخامه مش عارفين مين مش جاى القمه علشان سى ولى عهد مش عارف مين شتمه ...وجلالة مين مقاطع سمو مش عارف مين اصله زعقله وتلاقى عمرو موسى ف النص" بس يا حبيبى متشدش كرسى سمو الفخامه زميلك..بس يا فخامتك سيب برايه سموه ..انته ياعظمتك متشدش ودان جلالته "قاعدين ف حضانه جامعه الدول العربيه احنا

وكل شويه ضرب واحتجاج ..ضرب واحتجاج..ضرب واحتجاج.. ايه هو كله احتجاج احتجاج مفيش مره شتيمه

بلاش كاسفه بقى صحابى الالمانى أكل وشى وبيسال معندناش جيش ولا أيه ؟ بس انا مسكتش اه والله مسكتش انا احتجيت على كلامه وقلتله..."لا يا ساشا _خد الكاتشب_احنا جيشنا اسد هصور_خد الملح_ بس احنا لازم الأول نحكم صوت العقل هناخد ايه من الحرب احنا ناس عقلانين" وحطيت وشى على الطبق


طب ليه ما الباب الى يجيلك منه الريح

نقفل الجامعه خالص ولا بقى تقولى اتفاقيه دفاع مشترك ولا اخوه ولا أشقاء ولا نيله
دا انا بطلت اسمع كوره بسببكم

كل شويه منتخب مصر يلاعب منتخب مش عارف مين الشقيق

النادى الاهلى يلاعب نادى مدرك ايه الشقيق

والجماهير الشقيقه ماسكه بعض ف المدرجات طلتيش وشتيمه ومقطعين بعض تقلش جهاد مقدس

يا عالم احنا مش أشقه

احنا عار على بعض ولو أشقه نبقى كلنا ولاد حرام

اقفلوها وريحونا من وجع الدماغ دا ساعتها على الاقل افهم الى بيحصل وافهم ليه احنا ساكتين خلاص مش أشقه ناس عادى بتتخانق ف الشارع حتى نأجر المقر شقق مفروشه دى عالنيل وترد الروح ..طب اسمعوا كلامى كدا دا الفكره دى هتزيد من التقارب والتلاحم والتداخل العربى المصرى المشترك ونحل مشكله البطاله من الجنسين لأن شبابنا كمان بقى منفتح زيه زى البنات بالظبط


اقولكم أنا اسف ..انا ميرضينيش ان عمور ينطرد ويتسوح هيشتغل فين... بلاها عمور الراجل برضه كباره وان مشلتهوش الارض يشيله اصحاب السمو والفخامه فوق تيجانهم

الغلابه الى شغالين معاه يروحوا فين وكمان فكرتى هدامه للفكر الاخلاقى المستنير القائمه عليه حضارتنا العربيه


احنا نلغى عضويه فلسطين

مدفعوش اشتراك الجامعه ..عليهم فلوس متأخره لشركه المايه..مدفعوش اشتراك الوصله أى حجه

وندخل مكانها التشاد.. التشاد شعب شقيق برضه ومريح


ساعتها بقى انام وانا مستريح

وهقفل عينى وودنى مهما مش اشقه بقى

اعملوا اى حاجه

بس والنبى مش عاوزكم تحتجوا ولا تشجبوا ولا تدينوا

اقفلوا المحل.... متجبوش نشرات ...اقفلوا قنوات الاخبار خالص
وافضلوا زيعوا طول النهار الجو بديع والدنيا ربيع وقفولوا على كل المواضيع

انا عارف ان لا الدنيا ربيع ولا الجو بديع فى اى وقت من السنه عندنا لا ربيع ولا غيره

بس هصدقكم وهصقف وهرقص وهغنى كمان
قفل قفل قفل
ويا فلسطين انا مش شقيق حد

2008/12/27

صديقى العزيز القديم

اقبلت عليه مسرعاً بحماس شديد..صديقى العزيز القديم لم اره منذ سنين ..واقبل على بنفس الحماس ..كانت ابتسامته العريضه تبارز ابتسامتى فى اتساعها ورحابه رزاعيه المفرودتين باتساع عالمنا القديم تتلهف لزراعى المفرودتين بنفس الاتساع..العيون الامعة بالفرح المالح ترى اكثر من شخصان التقيناهما مصادفه ..شخص له والاخر لى...كلمات خرجت من فمى واخرى من فمه..ضحكات من قلبى واخرى من قلبه ..وزكريات من روحينا...ورحل ...لأكتشف ...انه مجرد صديق عزيز قديم

صبار

دخلنا المقابر صبيحة يوم عيد النحر من الجهة الغربية..تاركين ورائنا زحام سوق العيد فى قريتنا الذى لم أزره من سنين..منذ كففت عن شراء ملابس جديدة والتباهى بالعيدية امام ابناء العمومة أقران الطفولة القريبة.
تيارات الهواء البارده تعبث بطرف جلباب ابى ..شعاع الشمس المرتعش ينعكس على نظارتى الشمسية,شعاع متردد مهزوز يستحى فشله تدفئة قلبى.
كان قبر عمى فى اخر الممر..أخضر , مدرج الى اعلى كهرم قصير خجول..اراه من مكانى بين المقابر الاخرى ..مميز بلونه وبنائه ,مشابه فى الارتفاع والوظيفه
كانت اقدامنا على التراب الاحمر الناعم تترك اثرا ولا تصدر اصواتا يتطاير التراب مع كل خطوه فى تأنى صاحب الدار ليهبط على حذائى الرياضى
"اديدس ,ستان سميث , تمشى بيه ف اى حته هيريح رجلك على الاخر يا باشا"
اقتربت منه باردا كالجو خارج نطاق معطفى الصوفى الناعم..اسمه محفور على قطعه رخام صفراء حائله اللون..تاريخ وفاته ودعاء
فقط !
ونبات صبار مقتول مرمى فوق طرف قصى من القبر,كان لونه كلون لسان بقرة الاضحيه ,باهت الحمره كالموت باهت ككل شئ هنا فقط ..التراب كان واثق اللون .حاولت ابعاد الصبار..لم اصل اليه
كان يخرج لى عشرة السنه تحمل اشواكاً , متبجحاً ببعده عن يدى
اخفض ابى يديه وتمتم
"امين"
بمبالة من يريد ان ينتهى
"اين قبر جدى ؟"
قال بصوت هادئ
"هنا"
اردف بعد نفس عميق
"كسرت لوحته ونحن نضع عمك"
نظرت للصبار ..كان هذا فوق احتمالى ..هو وحده يزكرنى بالموت هنا ..قلت بعصبيه
"هنا !"

"سنأتى جميعا هنا انا ,انت , اخوك, وابنائكم "
كان يتكلم ببطئ شديد
اغمض عينيه وأعاد رأسه الى الوراء فرسمت الشمس على وجهه ظلال..فتح عينيه مره اخرى
"كلنا سنأتى هنا"
استدار الى القبر ..وضع يديه عليه ..وانحنيت انظف حذائى
يحرك شفتيه وهو مطرق الى اسفل..احرك المنديل الورقى بعصبيه على الحذاء..عينه مغمضه ..اجول من خلف نظارتى فى المكان
يشهق
وازفر
ساكن كالتمثال ..هادئ
اخرج سيجاره ..اتملل
"كلنا"
قالها فجأه كصرخة الم قصيرة
كلا النافيه ولام الجزم
كمقصد وهروب
قالها وتجمدت..رفعت عينى اليه
ادخلت سيجارتى مكانها..وضعتها بجيبى الداخلى سحقتها الى أسفل خلعت نظارتى الشمسيه.

وتحرك الصبار ساقطا مع تيار هواء مفاجئ حمل لنا تهليل طفل لعيد بعيد